Serhou Guirassy është në formën më të mirë të karrierës dhe duket se asnjë mbrojtje nuk është në gjëndje ta ndalë në Bundesliga. Dortmund vazhdon pa humbje në startin e sezonit 2025/26 që e konfirmoi me një fitore komode, 2-0 ndaj Heidenheim në javën e 3. E si zakonisht, Guirassy ishte zemra e fitores pas zhbllokimit të rezultatit. Ajo ishte ndeshja e 4 e sezonit dhe Guirassy ka qënë gjithnjë në listën e shënuesve. Ndërsa vetëm në kampionat ai ka shënuar në 8 ndeshjet e fundit rradhazi. Jo keq po të shohësh që Pierre-Emerick Aubameyang ishte i fundit te Dortmund që e bënte dicka të tillë në vitin 2015. Guirassy ka shënuar 19 herë në Bundesliga në vitin kalendarik 2025 – vetëm Kylian Mbappé ka bërë më mirë se ai në 5 kampionatet kryesore në Europë. Me 74 gola në të gjithë kompeticionet prej startit të sezonit 2023/24, Guirassy ka shkruar emrin e tij si një ndër shënuesit më të mirë në Evropë. Pas vendit të 4 një sezon më parë, Dortmund ka si objektiv të ngjitet më lart dhe starti solid po vendos nën presion kampionët e Bayern Munich. Ndaj me Guirassy në një formë të tillë, asgjë nuk është e pamundur.
