Sipas shtypit gjerman, Borussia Dortmund ka identifikuar një zëvendësues të mundshëm për Nico Schlotterbeck, në rast se mbrojtësi nuk pranon të rinovojë kontratën me klubin.
Rinovimi me qendërmbrojtësin 25-vjeçar, i cili ka kontratë deri verën e ardhshme, është prioritet absolut për Dortmundin. Megjithatë, kur Bayern Munich, Real Madrid dhe Liverpool ndjekin nga afër mbrojtësin e përfaqësueses gjermane, drejtuesit e BVB-së po përgatiten edhe për skenarin më të keq.
Sipas të njëjtit burim, Dortmund ka vendosur në shënjestër Axel Disasi-n e Chelsea-t si pasues të mundshëm të Schlotterbeck nëse ai largohet në verë. Mbrojtësi francez 27-vjeçar është aktualisht jashtë planeve në klubin londinez dhe madje nuk po stërvitet me ekipin e parë.
Edhe pse Chelsea pagoi 45 milionë euro për të në vitin 2023, mungesa e minutave e ka ulur ndjeshëm vlerën e tij në treg. Për më tepër, paga e tij prej 5 milionë euro në vit është brenda mundësive financiare të Dortmundit.
Disasi ka punuar më parë nën urdhrat e trajnerit aktual të BVB-së, Niko Kovač, gjatë periudhës së përbashkët te AS Monaco. Një ribashkim mes tyre mund të bëhet realitet nëse Schlotterbeck largohet – ose edhe në rast se Niklas Süle vendos të mos rinovojë kontratën e tij, e cila skadon në verën e vitit 2026.
