Bologna prek me një këmbë finalen e Kupës së Italisë. Në aktin e parë të gjysmëfinales, skuadra nga Emilia Romagna arriti të fitonte 3-0 në transfertë ndaj Empolit. Sfida u zhbllokua në minutën e 23, me anë të Ricardo Orsolinit. Më pas, do të kalonin vetëm 6 minuta dhe Thijs Dallinga do të realizonte të dytin për ekipin e tij.
Në pjesën e dytë, Dallinga arriti ta dërgonte sërish topin në rrjetë dhe të dytin personal. Një mbrëmje gjithashtu pozitive rezultoi të ishte dhe për Dan Ndoye, i cili dha dy asiste për shokët e skuadrës.
Megjithëse futbolli është një sport i paparashikueshëm, rezultati 3-0 i aktit të parë të gjysmëfinales, duket se i ka vënë kapakun çështjes së kualifikimit, me Bolognën, që duhet të presë mbrëmjen e 22 Prillit për të prerë biletën drejt finales. Bologna do të provojë të shkojë në finalen e Kupës së Italisë, për të parën herë që nga viti i largët 1974, teksa kompeticionin në fjalë, ka arritur ta fitojë dy herë në historinë e saj.
Bologna e këtij sezoni, po përjeton një rrugëtim të mrekullueshëm me në krye trajnerin Vinçenzo Italiano. Në kampionat, ekipi kuqeblu klasifikohet në vendin e katërt, zonë që të dërgon në Champions League, diçka që për Bolognën, do të ndodhte për të dytin vit radhazi.
