Bayern Munich ka lajmëruar prej kohësh se do të jetë ndër skuadrat më aktive në merkato. Madje ende pa përfunduar sezoni, gjermanët kanë zyrtarizuar dy blerjet e para, Lucas Hernandez dhe Benjamin Pavard. Megjithatë, drejtuesit bavarezë vazhdojnë të jenë në kërkim të alternativave që do të zëvendësojnë dy veteranët e skuadrës, Franck Ribery e Arjen Robben, që kanë lajmëruar me kohë largimin e tyre. Nëse për vendin e francezit, trajneri Niko Kovac ka alternativa mjaft të mira si Serge Gnabry e Kingsley Coman, për vendin e Robben ende nuk gjetur një emër i duhur. Prej disa javësh është përfolur për një interesim të madh të Bayern për talentin e Chelsea-t, Hudson-Odoi, por pas dëmtimit të rëndë që pësoi 18-vjeçari, vëmendja mund të spostohet diku tjetër.
Mediat italiane janë ato që kanë zbuluar se kampionët e Gjermanisë kanë kërkuar informacione për talentin e Fiorentinas, Federico Chiesa. 21-vjeçari mbetet një nga lojtarët më të dëshiruar të merkatos europiane dhe kësaj liste tashmë i është shtuar edhe Bayern. Skuadra bavareze flitet se është gati të paguajë deri në 70 milionë euro për kartonin e Chiesas, i cili me gjasa në verë do të braktisë Firenzen. 21-vjeçari numëron 35 ndeshje gjatë këtij sezoni, ku ka qenë gjithmonë pika kyçe e skuadrës vjollcë. Deri më tani ai ka shënuar 12 gola dhe ka shërbyer 8 asiste, ndërsa është edhe ndër lojtarët që krijon më shumë raste në kampionatin italian.
