Ivan Rakitic mendohej të ishte shumë pranë largimit gjatë merkatos së janarit, por gjërat për mesfushorin kroat ishin mjaft të ndërlikuara. Për këtë arsye, largimi i tij nga Barcelona thuhet se do të ndodhë vetëm në fundin e këtij sezoni, gjatë merkatos verore. 31-vjeçari nuk është i kënaqur me minutazhin tek katalanasit dhe kërkon të nisë një aventurë të re. Ofertat për të nuk mungojnë, pasi që më herët, interes për transferimin e tij kanë shfaqur skuadra si Inter apo Manchester United. Megjithatë, sipas asaj që raportojnë mediat spanjolle, destinacioni i ardhshëm i Ivan Rakitic mund të jetë Atletico Madrid. ‘Los rojiblancos’ kërkojnë me ngulm të përforcohen në mesfushë dhe duke parë situatën e Rakitic tek Barcelona, ata mendojnë të përfitojnë për të afruar një lojtar të klasi të lartë si kroati. 31-vjeçari u bë pjesë e Barcelonës në vitin 2014, kur u transferua nga Sevilla.
Aktualisht, ai ka një kontratë që e mban të lidhur me katalanasit deri në mesin e vitit 2021. Gjasat që Rakitic të rinovojë me Barcelonën janë të pakta dhe shumë media në Spanjë flasin për nisjen e bisedimeve mes drejtuesve të Atletico Madrid dhe përfaqësuesve të lojtarit. Nëse do të arrihet një marrëveshje verbale me Rakitic, Atletico do të hidhet në sulm për të gjetur marrëveshjen e duhur edhe me Barcelonën, që duke parë se lojtarit i skadon kontrata në fundin e sezonit të ardhshëm, do të kërkojë të përfitojë sa më shumë nga shitja e tij. Problemi i Atletico në këtë aspekt është edhe konkurenca, pasi shumë skuadra janë gati të hapin një ankand për shërbimet e mesfushorit kroat.
