Karriera e 36-vjeçarit Michael Carrick do të përmbyllet në fund të këtij sezoni. Mesfushori i Manchester United-it ka konfirmuar lajmin që përflitej prej kohësh. Vjen një moment që trupi nuk e përballon dot nivelin e lartë të sforcimeve dhe për këtë të duhet të ndalosh, ishte komenti i anglezit që fanellën e Djajve të Kuq e mban veshur që prej vitit 2006-të, kohë kur u transferua nga Tottenham për 18 milionë paundë.
Sipas BBC-së, Carrick do të pranojë postin e trajnerit të moshave po te United dhe kështu nuk është se do të largohet shumë nga Old Trafford. Në muajin janar, Jose Mourinho pati thënë se do të ishte tejet i lumtur nëse 36-vjecari do të qëndronte te klubi me një rol jashtë fushe. Këtë vit Carrick ka luajtur vetëm 4 ndeshje. Ai nuk ka mundur të jetë i vazhdueshëm pranë skuadrës për shkak të një problemi me zemrën.
Rrahje të çrregullta dhe simptoma aritmie kanë bërë që ai të ketë shpesh shkëputje nga grupi. Shtatlarti numëron 463 ndeshje me Unitedin, 34 me Anglinë 75 me Tottenhamin dhe 150 të tjera me West Hamin. Gjatë karrierës në Old Trafford fitoi 5 kampionate, 1 Champions League dhe u konsiderua kapiteni i skuadrës pas largimit të Rooney-it këtë verë.
