Një qafë dy herë më të gjatë e më të hollë se vajza mesatare. Këmbë 50% më të gjata se krahët. Po flasim për kukullën ikonike, Barbie. Së shpejti do të punohet për një film gjysëm të animuar për të, por me këto përmasa vështirë të gjendet një aktore për rolin e saj. Gjithsesi, qarkullojnë lajmë se aktorja e njohur Margot Robbie mund të jetë duke konkuruar pikërisht për të qenë “Barbie” e ardhshme! “The Hollywood Reporter” ka treguar se Margot është në bisedime e sipër me kompaninë Warner Bros. Filmi synon të arrijë standarde të larta, dhe të mos ketë të njëjtin përfundim si ato me Amy Schumer dhe Anne Hathaway që u lanë përgjysmë.
Thuhet gjithashtu se për prodhimin e filmit do të ngarkohet kompania e vetë aktores. Ky do të jetë një tjetër sukses për të. Barbie, përveç përmasave të trupit të paarritshme, ka dhe rreth 150 përvoja pune në CV e saj duke filluar nga infermiere, instruktore aerobie e deri tek pilote dhe oficere policie. Pak si shumë për t’i kërkuar aktoreve, apo jo? Megjithëse asgjë nuk është konfirmuar, Margot me flokët e saj të gjatë bjondë, sytë blu dhe një buzëqëshje perfekte, me siguri do të përshtatej siç duhet me këtë rol.
