14 njerëz në një shtëpi në Këln, në Gjermaninë perëndimore, do ta marrin vesh të fundit që bota po përballet me një pandemi. Ato janë pjesë e Big Brother.
Shumica e banorëve janë izoluar që më 6 shkurt, kur koronavirusi sapo kishte nisur të bëhej problem botëror. Që nga ai moment, janë shkëputur nga bota jashtë. Vetëm një prej tyre ka njëfarë informacioni mbi gjendjen e pandemisë sepse u fut në shtëpi më 6 mars. Producentët e emisionit thanë për gazetën gjermane Suddeutsche Zeitung se nuk i kanë informuar mbi gjendjen botërore sepse është kundër rregullave.
Pas kritikave në rrjetet sociale, producentët ndërruan qëndrim dhe njoftuan transmetimin e një episodi special në të cilin banorët do të informohen mbi krizën botërore.
