Gjykata e Apelit në Turqi dënoi me 11 muaj dhe 20 ditë burg aktoren Zuhal Olcay për fyerje të presidentit turk, Recep Tayyip Erdogan.
Autoritetet filluan një hetim ndaj Olcayit në vitin 2016, pasi morën një ankesë se këngëtarja ndryshoj tekstet e këngëve dhe se përdori gjeste për të fyer Erdoganin në një koncert në Stamboll.
Në tekstet e ndryshuara të këngëve ajo shprehej “Recep Tayyip Erdogan, është bosh, është gënjeshtër. Jeta do të mbarojë një ditë dhe do të thuash ‘Unë kisha një ëndërr’.”
Në dëshminë e saj, aktorja e njohur u shpreh se ndryshoi tekstin sepse emri i presidentit përshtatej me rimën.
Prokurorët kërkuan dënim 4-vjeçar për Olcay. Por një gjykatë në Stamboll e dënoi vitin e kaluar për 11 muaj dhe 20 ditë burg, por e pezulloi atë.
Avokatët e Erdoganit e apeluan vendimin, duke kërkuar që të vihej sa më parë në fuqi vendimi për dënimin e aktores.
