Në letra mund të jetë shkruar se Anglia do të fitojë “Euro 2024”, por një gjë të tillë refuzoi ta konfirmonte fallxhorja të cilën ka vizituar Fill Foden dhe e dashura e tij përpara nisjes së turneut. Futbollisti më i mirë i Mançester Sitit dhe Premier Ligës në sezonin që lamë pas fitoi titullin e katërt radhazi me klubin, ndërsa 24-vjeçari pritet të jetë një prej liderëve të skuadrës së Garet Sauthgejtit në Gjermani. Ai shpreson të mbyllë sezonin duke i dhënë fund pritjes 58-vjeçare të Anglisë për një triumf të madh në një turne dhe këtë nuk ia lë vetëm fushës. “The Sun” zbuloi se ai ka takuar një fallxhore bashkë me partneren e tij shtatzënë Rebeka Kuk vetëm disa ditë përpara se të nisej për në Gjermani.
Atij iu dha një letër tarot e cila lexohej nga Kloe Smith, por 25-vjeçarja këmbënguli në “Instagram” se ajo nuk do të zbulonte saktësisht se çfarë i tha Fodenit dhe Kuk: “Një lexim është personal dhe asnjë detaj nuk ndahet me dikë, qoftë nëse je një personazh i famshëm apo jo”, shkruante ajo. Nga ana tjetër, një burim tha për “The Sun” se Foden ishte shumë i interesuar ta dëgjonte nga fallxhorja emrin e skuadrës fituese, megjithëse nuk konfirmuan nëse i ishte thënë se ai do të prekte lavdinë në Gjermani. “Fill ishte po aq i etur sa Rebeka për të përfunduar leximin, veçanërisht me një turne kaq të madh në horizont”, raportohet për ‘ The Sun”. Mëtej u tha: “Shpresojmë që Kloe t’i ketë dhënë atij një përgjigje”!
Por çfarëdo që i është thënë Fodenit, ai dukej i befasuar nga rezultati. Foden, i cili pret fëmijën e tij të tretë me Kuk , ndodhet në Gjermani ndërsa përgatitet për ndeshjen hapëse të Anglisë në Europian, kundër Serbisë të dielën mbrëma. Mesfushori polivalent duket i sigurt se do të startojë për skuadrën e Garet Sauthgejtit pasi e dërgoi lojën e tij në një nivel tjetër gjatë 12 muajve të fundit.
