Sipas një anketimi në Turqi, “Dashuri me Qira” ishte një nga serialet që i kishte munguar më shumë publikut. Të njëjtën gjë mund të themi edhe për publikun shqiptar, të cilët ranë dakord me këtë fakt. Historia e Defne dhe Omer ka qenë një nga historitë më të bukura të dashurisë. Kjo komedi romantike rikthehet në ekranin e Jolly HD me 2 episode premiere, nga e hëna në të premte në orën 14:30. Dy seritë e para nisin sot!
Për të gjithë ju që do ta shihni për herë të parë këtë serial, ne ju tregojmë më shumë se si do të nisin ngjarjet.
Defne Topal e gjen veten në mes të një loje të rrezikshme në kërkim të parave për të larë borxhin e vëllait të saj. Ajo është një kameriere, e cila kujdeset për gjyshen, motrën dhe vëllanë e saj më të madh. Prindërit e kanë braktisur që në fëmijëri. Një ditë, në restorantin ku ajo punon vjen një djalë, i cili e puth krejt papritur si për t’u justifikuar para tetos së tij, Nerimanit, e cila i ka gjetur një vajzë për ta fejuar. Jeta e Defnes do të ndryshojë menjëherë pas kësaj puthjeje. Nerimani i bën një ofertë për t’u martuar me burrin që ajo ka marrë me qira për të. Për të shpëtuar të vëllanë nga borxhet, ajo e pranon këtë ofertë. Ka vetëm gjashtë muaj kohë për t’u martuar me të dhe për ta lënë. Kur Defne bëhet pjesë e jetës së Omerit, gjithçka do të ndryshojë përgjithmonë.
A do të arrijë Defne të përmbushë misionin për të cilin është paguar? Do të kuptojë Omer lojën dhe ti falë asaj sekretin? A do të shndërrohet dashuria me qira në dashuri të vërtetë?
