Sipas institutit të shërbimeve meteorologjike ”MeteoAlb”, java që po lëmë pas ishte një nga javët më të nxehta të përjetuara ndonjëherë duke shënuar temperatura të cilat i kaluan të 40 gradët. Termometri regjistroi vlerën maksimale ditën e djeshme (41.4 gradë Celcius) në qytetin e Beratit. Por, duke filluar nga e diela parashikohet një rënie e lehtë me 7 gradë Celcius, rënie që do të te pasojë edhe në ditët në vijim. Temperaturat në 10-ditëshin e parë të korrikut do të variojnë nga 30-33 gradë Celcius për zonat e ulëta e bregdetare dhe 26-27 gradë Celcius në zonat malore. Megjithatë sinoptikanët paralajmërojnë se vala e të nxehtit do të rikthehet në korrik, i cili do të jetë edhe muaji më i nxehtë i kësaj vere. Temperaturat e larta do të prekin më së shumti pjesën jugore-juglindore te Europës, sakaq pjesa tjetër e kontinentit do të përjetojë gjate kësaj vere alternim te ndryshimeve ekstreme te motit, si stuhi, rrebeshe, përmbytje dhe valë të shkurta të nxehti.
