Lëvizja me autobusa në Tiranë pritet të bëhet pak më e thjeshtë për banorët e qytetit. Kjo, pasi është krijuar një aplikacion enkas për transportin publik. “Tirana Public Transport” quhet aplikacioni më i ri, i cili u vjen në ndihmë banorëve të qytetit të përdorin transportin publik.Ky aplikacion do të japë të dhënat e të gjithë autobusave që ndodhen në qytet dhe me anë të një harte, do të dalloni se ku ndodhet ekzaktësisht autobusi që ju po prisni.
Autobusat do të shfaqen me pika blu në hartë, e cila do të përditësohet çdo 10 sekonda, për të dhënë kështu informacionin e saktë për vendndodhjen e tyre. Çdo linjë autobusi do të ketë një ngjyrë specifike, në mënyrë që të mos ngatërroheni me autobusat e linjave të tjera. Gjithashtu, në aplikacion mund të shënoni vendin ku doni të shkoni dhe ai do u sugjerojë rrugën dhe linjën më të favorshme që duhet të merrni.
