Sot shteti i Kosovës feston përvjetorin e shtatë të Pavarësisë. Më 17 shkurt të vitit 2008 në një seancë solemne Kosova u shpall shtet i pavarur që deri në atë kohë administrohej nga UNMIK-u.
Shpalljes së Pavarësisë i ka paraprirë një proces i gjatë që nga viti 1989 por edhe më herët ku popullata shqiptare nuk iu ka bindur asnjëherë regjimit komunist dhe atyre serbë të ish-Jugosllavisë. Pas suprimimit të autonomisë në vitin 1989 nga ish diktatori Sllobodan Milosheviq.
Popullata shqiptare u përjashtua nga puna, nxënësit nga shkollat kështu që u krijuan institucione paralele. Në atë kohë dolën edhe partitë e para politike si LDK-ja e udhëhequr nga Ibrahim Rugova. Ai ushtronte politikë paqësore dhe mundohej që me këto mjete të arrihej deri te pavarësia.
Duke e parë represionin e vazhdueshëm të policisë dhe ushtrisë serbe ndaj popullit shqiptar filluan të dalin grupet e para të armatosura ku edhe dolën publikisht më 28 nëntor 1997 në Llaushë të Drenicës me emrin Ushtria Çlirimtare e Kosovës.
Në vitin 1998 filluan sulmet e policisë mbi fshatrat ku qëndronte UÇK-ja për tu zgjeruar edhe në gjithë territorin e Kosovës.
Në mars të vitit 1999 NATO filloi sulmet ajrore mbi Serbinë pas marrëveshjes së Rambujesë e nënshkruar vetëm nga pala kosovare. Gjatë kësaj lufte u vranë mbi 12 mijë shqiptarë, shumë u plagosën, më shumë se një milion njerëz u deportuan ndërsa u dogjën shumë shtëpi dhe shkolla
Në qershor të vitit 1999 Serbia pranoi kapitullimin dhe nga ky moment filloi një kthesë e re për shqiptarët.
Kosova administrohej nga UNMIK-u, UÇK u çarmatos e cila u shndërrua në TMK e cila e kishte rolin si organizatë civile me kompetenca të vogla.
Për të gjetur një zgjidhje për statusin e Kosovës OKB angazhoi ish presidentin finlandez Martti Ahtisaari i cili propozoi një plan gjithëpërfshirës për statusin Kosovës me një pavarësi të mbikëqyrur ushtarake ndërkombëtare. I gjithë procesi u dakordua me Prishtinën dhe u miratua shpallja e koordinuar e pavarësisë ndërmjet Uashingtonit, Brukselit dhe Prishtinës, sipas planit të Ahtisaarit.
Kështu, Bashkimi Evropian miraton dërgimin e misionit civil në Kosovë për të mbikëqyrur zbatimin e pakos së Ahtisaarit dhe për të siguruar sundimin e ligjit në shtetin më të ri të familjes evropiane. Pas këtij hapi, Kosova shpall pavarësinë më 17 shkurt të vitit 2008. Po në këtë vit Kosova u bë me Kushtetutë ndërsa një vit më vonë TMK u transformua në FSK por me kompetenca si të njëjta me TMK-në. Pritet që Kuvendi të miratojë ligjin ku FSK të shndërrohet në ushtri.
Shtatë vjet pas shpalljes së Pavarësisë Kosova po përballet me papunësinë e madhe, me protesta të arsimtarëve, minatorëve dhe mbi të gjitha me ikjen e qytetarëve nga vendi.
Sipas statistikave mbi 50 mijë qytetarë vetëm nga nëntori i vitit të kaluar deri më tani e kanë braktisur Kosovën. Në mesin e të ikurve janë edhe mbi 5 mijë nxënës, ndërkohë që po vazhdon ende ikja e njerëzve që nëpërmes territorit serb po ia mësyjnë shteteve të Evropës.
