Moti i keq me erëra të forta i pasdites së të dielës ka shkaktuar rrëzimin e disa pemëve, objekteve e linjave elektrike. Ministria e Mbrojtjes ka deklaruar se situata është nën kontroll, por u ka bërë thirrje qytetarëve të shmangin pallatet, godinat e larta, pemët dhe objektet e rrezikshme pasi ka rrezik për aksidente.
Reagimi i Ministrisë së Mbrojtjes:
Ministria e Mbrojtjes, përmes Agjencisë Kombëtare të Mbrojtjes Civile, nisur nga situata e pazakontë e erës së fortë gjatë orëve të fundit në disa qarqe të vendit, i bën thirrje qytetarëve, të shmangin qëndrimet në afersi të pallateve, godinave të larta, pemëve dhe objekteve të rrezikshme. Rënia e sendeve dhe objekteve të ndryshme për shkak të erës përherë e më të fortë, mund të bëhen shkak për aksidente.
Ndërkohë, Ministrja Xhacka përmes AKMC është në komunikim të vazhdueshëm me shtabet e emergjencave në të gjitha prefekturat, për të ndjekur orë pas orë situatën e vështirë të motit të shkaktuar nga erërat dhe bora në disa qarqe. Sipas informacioneve paraprake të deritanishme situata është nën kontroll dhe nuk raportohen probleme.
