Teoria e evolucionit dhe “Big Bang” janë të vërteta dhe Zoti nuk është “një magjistar me shkop magjik”, ka deklaruar Papa Françesku. Duke folur në Akademinë e Shkencave Papnore, Papa ka thënë se për ekspertët kjo shënon fundin e “pseudo teorive”. Papa shpjegoi se të dy teoritë nuk e përjashtojnë ekzistencën e krijuesit. “Kur lexojmë për krijimin e gjenezës, ne priremi të imagjinojmë një Zot magjistar, me një shkop magjik që është në gjendje të bëjë çdo gjë. Por, nuk është kështu”, u shpreh ai.
“Big Bang, që mendohet se është origjina e botës, nuk është në kontradiktë me ekzistencën e krijuesit, por përkundrazi e kërkon atë”.
Kisha Katolike ka një reputacion të hershëm anti-shkencë – sidomos që pas dënimit të shkencëtarit italian Galilo Galilei për teorinë se Toka rrotullohet rreth Diellit.
Komentet e Papa Françeskut janë vazhdimi i rrugës progresive të Papa Piut XII, i cili hapi dyert për idenë e evolucionit dhe që pranoi teorinë e Big Bang. Xhon Pali II shkoi edhe më tej duke thënë se evolucioni është më shumë se një hipotezë.
